Oleh: Mel Sofyan
Pambangunan Jalan Tol Padang–Bukiktinggi adolah salah satu proyek gadang nan bakal mangubah wajah Sumatera Barat. Jalan tol ko indak sajo mampacek wakatu baraja dari Padang ka Bukiktinggi jo mambuko akses ka Provinsi Riau, tapi juo barpotensi mambangkikkan ekonomi daerah, manguatkan logistik, manambah daya saing, serta mambuko kasampatan usaha nan labiah lueh.
Tapi, kaba hasil pambangunan indak sabana diukua dari bara kilometer jalan nan lah salasai dibangun, bara gadang investasi nan masuak, atau bara lamo wakatu parjalanan nan bisa dihemat. Pambangunan baru bisa dikatokan barhasil kalau masyarakat nan lah maralakan tanahnyo juo ikut maraso manfaat ekonomi nan lahia dari proyek ko.
Salamo ko, pambebasan lahan biaso baranti di pambayaran ganti rugi. Itu memang hak masyarakat dan wajib dipanuhi sacara adil. Tapi sasudah tanah dibayia, hubungan ekonomi antara masyarakat jo jalan tol biaso putuih. Padahal, tanah nan lah dilepaskan itu bakal taruih manghasilkan nilai ekonomi salamo puluhan tahun malalui lalu lintas, logistik, pariwisata, jo perdagangan.
Dek karano itu, lah wakatu nyo cara pandang pambangunan diubah. Negara indak cukup mambayia tanah rakyat, tapi juo harus mamastikan rakyat tetap punyo jalan untuak ikut manikmati hasil ekonomi nan lahia dari pambangunan.
Salah satu gagasan nan patuik dipikiran adolah mambangun rest area labiah banyak jo konsep nan khas Minangkabau. Rest area ko jan hanyo jadi tampek baranti, tapi jadi pusat ekonomi rakyat. Di sinan UMKM, petani, peternak, nelayan, jo pangrajin lokal dapek mamasarakkan hasil usahonyo ka ribuan urang nan lalu-lalang saban hari.
Satiok rest area bisa punyo ciri khas masing-masing. Ado nan mangangkat rendang, sate, lamang, kopi Solok, bareh Solok, buah-buahan dataran tinggi, sayua-sayuan, hasil peternakan, ikan aia tawar, kain tenun, sulaman, sampai ka hasil karajinan tangan dari nagari-nagari nan dilalui jalan tol. Jadi, jalan tol indak sajo mambao urang lalu, tapi juo mambao rezeki ka masyarakat.
Nan labiah penting lai, pamarintah jo badan usaha jalan tol patuik mambuek kabijakan agar masyarakat nan tanahnyo dibabaskan diprioritaskan untuak mampunyoi atau mangalola kios jo ruang usaha di rest area. Bukan sabagai ganti rugi tambahan, tapi sabagai bentuk pambardayaan ekonomi jangka panjang.
Kalau konsep ko diwujudkan, jalan tol ko indak hanyo jadi jalan panghubuang Padang jo Bukiktinggi atau ka Riau. Jalan tol ko bakal jadi Koridor Ekonomi Rakyat Minangkabau, tampek lahirnyo usaha-usaha baru, lapangan karajo baru, jo pasar baru untuak produk unggulan Sumatera Barat.
Model pambangunan sarupo ko layak jadi contoh di Indonesia. Infrastruktur indak lai dipandang sabagai jalan transportasi sajo, tapi juo sabagai alat untuak maratakan kesejahteraan masyarakat.
Jan warihkan ka rakyat carito bahaso tanahnyo hilang dek pambangunan. Warihkanlah carito bahaso dari tanah nan direlakan itu lahia ribuan palaku usaha baru, berkembang wisata kuliner Minangkabau, tumbuah ekonomi nagari, jo maningkeknyo kasajahteraan anak kamanakan di maso nan ka datang. Itulah hakikat pambangunan nan sabana: mambangun jalan, sakaligus mambangun masa dapan rakyat.
(KMKN)
